Til hamingju Áslaug!

Glæsileg viðurkenning fyrir mikla vinnu að ferðamálum á landsbyggðinni á undanförnum árum.

 Hjartanlega til hamingju með heiðursviðurkenningu hinnar íslensku fálkaorðu

Hætta að rífast!

Ég held að þaðSVo séu langflestir sammála því að kvótakerfið, í núverandi mynd, er ekki að uppfylla það sem lagt var til í upphafi þess.

Mér hefur hinsvegar ekki enn verið bennt á aðra miklu betri lausn sem gerir alla einstaklinga í voru samfélagi sátta.

Það sem sjávarútvegurinn þarf umfram allt er ró og friður um sín mál - hvernig sá friður kemst á er hinsvegar það sem menn deila um í dag.

Svona strákar hættið að rífast og reynið að finna leið sem gerir flesta sátta - slíkt hefur Einar Kristinn verið að vinna að í tengslum við "svörtu" skýrslu Hafrannsóknarstofnunar.  Það verður vonandi til þess að sá friður sem ég nefndi náist um málið.

Telur gagnrýni Einars Odds ekki trúverðuga

Umhverfis - og útivistar Lýðháskóli að Núpi í Dýrafirði

Fyrir um þremur vikum síðan átti ég fund með framkvæmdarstjóra UMFÍ og Halldóri, bæjarstjóra,  varðandi hugmynd um að setja á laggirnar lýðháskóla að Núpi í Dýrafirði komið sem hefði á námskrá sinni umhverfismál og hugsanlega einnig útivistarmálefni. 

En hvað er Lýðháskóli og hvað hefur slíkur skóli að segja fyrir atvinnumál hér á Vestfjörðum.

Fyrst hvað er Lýðháskóli?

Í raun er Lýðháskóli ekki réttnefni fyrir skóla af þessari gerð - réttnefni væri í raun lífsleikniskóli.  Nemendur fá ekki einingar fyrir nám sitt heldur gefst þeim kostur að kynnast umhverfinu og útivist á sem fjölbreyttastan hátt á stórkostlegum stað í Dýrafirði og nágrenni.

Slíkt form af skóla er rekið í víða á Norðurlöndum og einnig um allan heim.  Systursamtök UMFÍ í Danmörku (kallast DGI) hafa komið að stofnun 6 skóla sem hafa íþróttir og leiðtogaþjálfun í sinni námskrá.  Allir eru þessir skólar sjálfstæðar rekstrareiningar.  Þeir eru reknir með fjármagni frá danska ríkinu og einnig með skólagjöldum.  Í Danmörku eru um 45-50 Íslendingar við nám hverju sinni og njóta þeir styrks frá UMFÍ til skólavistar. 

UMFÍ hefur nú öðlast talsverða reynslu af rekstri skólabúða að Laugum í Sælingsdal.  Sá gamli Héraðsskóli öðlaðist nýtt líf við þá starfsemi og í dag starfa á milli 10-15 einstaklingar við rekstur skólabúðana.  Þangað koma á milli 1500-2000 ungmenni yfir vetrarmánuðina og síðan er húsnæðið rekið sem sumarhótel. 

UMFÍ ásamt DGI hafa áhuga á því að koma hér að stofn Lýðháskóla og vilja leggja til þekkingu á rekstri slíkra skóla, tengslum við aðra Lýðháskóla í heiminum og beinagrind að skólanámskrá.  Við heimamenn getum síðan starfrækt skólann með stuðningi ríkisins, sem yrði að leggja til rekstrarfjármagn. 

En hvaða þýðingu hefur slíkur skóli fyrir atvinnulíf hér?

Ég sé fyrir mér að skólinn myndi hafa um 70-100 nemendur á hverjum tíma.  Nemendur myndu koma í 6- 10 mánaða dvöl og einnig myndu hingað koma nemendur annarra Lýðháskóla í styttri tíma (2-3 vikur í senn).  Þarna yrðu að vera um 10-15 einstaklingar sem ynnu beint við rekstur skólans yfir vetrartímann.  Tengt þessu yrði síðan hægt að tengja þetta við víkingaverkefnið og vinnu við það, einnig Gíslasögu verkefnið, hugmyndum Sæfara að sjósportmiðstöð Íslands, ég sé mér verkefni fyrir Borea Adventures í tengslum við komur nemenda annarra lýðháskóla, tengingu við Skrúð og þá Landbúnaðarháskólann, einnig tengingu við Háskólasetur.  Svo má sjá fyrir sér aukningu í flugi hingað vestur og betri nýtingu Þingeyrarflugvallar og svo störf í tengslum við verslun og þjónustu.  Margt fleira má einnig tengja við þetta svo sem skíðasvæðið í Tungudal, Hornstrandir og hugmyndir að friðlandi þar og svo margt annað.

Það er mitt mat að þetta sé ekkert nema jákvætt að taka vel í þessar hugmyndir UMFÍ og DGI og leita allra leiða til að þetta verði að veruleika. 

Nú er boltinn hjá okkur heimamönnum og næstu skref eru að mínu mati viðræður við ríkisvaldið um húsnæðið og rekstrarfé.  Sjávarútvegsráðherra og Iðnaðarráðherra voru hér vestra fyrir um viku og áttu þeir fund með bæjarstjórn Ísafjarðarbæjar og var þessi hugmynd viðruð þar.  Tekið var jákvætt í þessa hugmynd og sagt að spennandi væri að skoða hana nánar.

 

Ný ríkisstjórn

Sjálfstæðisflokkurinn hefur náð saman með Samfylkingunni - það hefur verið ritaður stjórnarsáttmáli og flokkarnir hafa tilkynnt hverjir eiga að vera ráðherrar í nýrri "viðreisnarstjórn".

Mér líst svona ágætlega á ráðherrana - það er þó nokkuð sem kemur mér á óvart. 

Persónulega finnst mér furðulegt val Geirs að halda Birni Bjarnasyni áfram og setja Sturla út.  

Ég hefði viljað sjá Sturla sem ráðherra áfram.  Hann hefur staðið sig mjög vel í Samgönguráðuneytinu. Hann hefur sýnt það og sannað að hann er kröftugur og góður einstaklingur sem hefur komið mörgu góðu til leiðar í setu sinni sem ráðherra.  

Annað sem mér finnst athugavert við ráðherraskipan míns flokks er að það er eingöngu ein kona.  Nú á 21.öldinni hefði ég talið það vera mjög sterkt fyrir flokkinn að velja aðra konu til áhrifa. Einstaklingar eins og Guðfinna, Ásta Möller og Arnbjörg Sveinsdóttir eru konur sem koma vel til greina í slík embætti að mínu mati.  Það var mikil umræða um ráðherraskipan eftir kosningarnar 2003 en þá stóð Davíð sig ekki í því að veita konum brautargengi í sinni ríkisstjórn.   Mér finnst flokkurinn ekki vera að standa sig í þessum málum - þetta kemur mjög illa út, mjög illa.

Mér finnst Ingibjörg og Samfylkingin hafa komið vel út í gær.  Ingibjörg gaf sér góðan tíma til að svara fjölmiðlum, hún stóð við jafn kynjahlutfall ráðherra og mikil gleði ríkti í þeirra herbúðum.  Geir aftur á móti svaraði ekki vel spurningum fréttamanna, nánast hljóp í burtu og svaraði ekki spurningunum.  Konur í flokknum voru reiðar - þó þær styðja sitt fólk og eitthvað fát virtist á mannskapnum þegar fréttamenn spurðu spurninga eftir fundinn.  Svo eftir að hafa lesið sáttmála ríkisstjórnarinnar þá hefur Samfylkingin fengið að setja mjög mörg af sínum kosningarloforðum en ekki svo mikið finnst mér hafa verið sett fram af okkar hálfu.  S.s. mér finnst Samfylkingin hafa styrkst eftir daginn í gær en minn flokkur kom ekki vel út, þvi miður.

Ánægjulegt er að Einar Kristinn skuli halda ráðherraembætti sínu og bætir við sig landbúnaðarmálunum sem er vel.  Einar Kristinn hefur sýnt það, á skömmum tíma í ráðherrastól, að hann er að standa sig afar vel.

Eftir að hafa staðið nokkuð vel að undirbúningi nýrrar stjórnar finnst mér að Sjálfstæðisflokkurinn hafi staðið sig nokkuð illa í að kynna ráðherra fyrir landanum.

Kærar þakkir

Ég vil þakka þeim fjölmörgu sem hjálpuðu mér að halda úti kosningaskrifstofunni hér á Ísafirði. 

Það er einvala lið sem kom að þessum sigri okkar Sjálfstæðismanna í Norðvesturkjördæmi.  Hart var að okkur sótt en við stóðumst atið og stöndum nú uppi sigurvegarar þessara kosninga ásamt Vinstri grænum.

Ég vil þakka öllum enn aftur fyrir allt - þið eruð frábær!

 

Fjölmenni við kynningu á Vestfjarðarskýrslunni

Við sjálfstæðismenn fengum Halldór Halldórsson, bæjarstjóra, til að kynna skýrslu nefndar um leiðir til að styrkja atvinnulíf á Vestfjörðum í hádeginu í gær, mánudag, í kosningarmiðstöðinni í Silfurgötu.

Það voru um 100 manns sem komu til að hlýða á orð Halldórs og til að gæða sér á ljúffengri súpu.

Halldór kynnti hvernig starfið í nefndinni var háttað, hvernig skýrslan er uppsett og síðan fór hann yfir nokkrar tillögur og útskýrði hvernig ætti að koma þeim í framkvæmd.

Halldór sagði frá því að nefndin hafi fundað með aðilum í sveitarstjórnum, atvinnulífinu og stofnunum um alla vestfirði.  Inn á borð nefndarinnar komu fullt af tillögum sem farið var yfir af nefndarmönnum.  Eftir yfirferð þar voru tillögurnar sendar í ráðuneytin til yfirferðar.  Frá ráðuneytunum komu síðan þær 37 tillögur sem getið er sérstaklega um í skýrslunni.  Þessar tillögur eru frá ráðuneytunum og samþykktar inn í viðeigandi ráðuneyti og þeim á að framfylgja þar.  Þess má geta að sjávarútvegsráðuneytið hefur nú þegar auglýst þrjár stöður hjá Matís sem getið er um í skýrslunni.  Halldór lét þess getið í gær að formaður nefndarinnar, Halldór Árnason, hafi óskað eftir því við forsætisráðherra að nefndin héldi áfram störfum og sæi til þess að eftir skýrslunni yrði unnið.  Forsætisráðherra tók vel í þá hugmynd og mun því nefndin starfa áfram.

Að lokinni yfirferð á skýrslunni svaraði Halldór spurningum fundarmanna og sköpuðust fjörugar umræður um m.a. olíuhreinsistöð, Háskóla á Ísafirði, fangelsi á Núpi, hvort að um enn eina skýrslu væri að ræða sem ekki ætti að fara eftir og fl.  Halldór svaraði þessum spurningum og fór inn á fleiri efni sem tengist t.d. íbúakosningu í tengslum við olíuhreinsistöð.

Margir einstaklingar hafa haldið því á lofti undanfarið að ekki eigi að vinna eftir þessari skýrslu og því um marklaust plagg að ræða.  Ég segi að slíkt segi einstaklingar sem ekki hafa hana lesið né kynnt sér efni hennar og hvernig að henni var unnið.  Það hefur komið margsinnis fram, alveg frá upphaflegri kynningu á innihaldi hennar fram á þennan dag, að eftir tillögum skýrslunnar á að vinna.  Ríkisstjórn og ráðuneyti hennar hafa samþykkt framkomnar tillögur í skýrslunni og hafa því skuldbundið sig til að vinna að framgangi þeirra.  Ég tel að hvaða ríkisstjórn sem tekur svo við völdum hér eftir 12.maí geti ekki annað en unnið eftir henni og séð til þess að þær tillögurnar  komist í framkvæmd.

Kynningin fór fram að beiðni okkar sjálfstæðismanna en fram kom að Halldór og aðrir nefndarmenn væru reiðubúnir til að kynna skýrsluna sem víðast, væri eftir því leitað.

Fundurinn var haldinn í kosningamiðstöð Sjálfstæðisflokksins á Ísafirði og var sá fyrsti í röð súpufunda sem haldnir verða fram að kosningum. Næsti fundur verður haldinn á fimmtudaginn kemur (3.maí) og þá situr Einar Oddur Kristjánsson, alþingismaður, fyrir svörum um efnahagsmál.

 

Fylgi Sjálfstæðisflokksins í Norðvesturkjördæmi

Það er óhætt að segja að fylgi sjálfstæðisflokksins, sem og annarra flokka, hafi sveiflast mjög mikið að undanförnu og á því er dagamunur á eins og sannaðist nú um helgina.

Á föstudaginn kynnti Capacent könnun sem þeir gerðu 17. - 23.apríl, þar kom fram að sjálfstæðisflokkurinn var með 29,9% fylgi í norðvesturkjördæmi.  Á laugardaginn kynnti síðan RÚV könnun í kjördæmisþætti sínum um norðvesturkjördæmi og þar kom fram að sjálfstæðisflokkurinn var með 33,2% fylgi.

Nú ef maður skoðar hvað stendur á bakvið þessar tölur þá kemur ýmislegt í ljós.  Á bakvið könnun Capacent í kjördæminu kom fram að í úrtakinu voru aðeins 119 svarendur sem standa þar á bakvið.  Hinsvegar í könnun RÚV eru það 800 manns sem eru í úrtaki hennar og 64,5% svöruðu.  Því má segja að könnun RÚV gefi mun betri mynd af fylgi flokka í kjördæminu.

Sjálfstæðisflokkurinn er að mælast með nokkuð mikið fylgi í kjördæminu og mun hann halda sínum þremur mönnum ef þær tölur koma upp úr kjörkössunum 12.maí.

Það er von mín að niðurstaðan verði þessi - við sjálfstæðismenn eigum öfluga þingmenn sem hafa unnið vel fyrir okkur og komið mörgum hagsmunamálum okkar í gegn. Það á margt eftir að gera og ég treysti þessum mönnun fullkomlega til að koma því í framkvæmd á næstu árum.

Ég held að þegar fólk hlusti á frambjóðendur og skoði stefnur þeirra flokka, sem þeir eru í kjöri fyrir, muni það sjá að sjálfstæðisflokkinn er rétta valið í komandi kosningum. 

Stofnfundur Vestra

Í gær, laugardaginn 28.apríl, var haldin stofnfundur íþrótta-og ungmennafélagsins Vestra í blíðskaparveðri á Ísafirði.

Ég mætti á fundinn og flutti stofnræðu félagsins.

Þarna er um að ræða sameiningu þriggja íþróttafélaga (KFÍ, Vestra og BÍ) sem sjá mikinn hag í því að sameina krafta sína iðkendum sínum til framfara.

Kosin var stjórn og er Sveinfríður Högnadóttir formaður, Guðni Guðnason, gjaldkeri og Rúnar Guðmundsson, ritari.  Meðstjórnendur eru síðan Haraldur Ísaksen og Þórdís Jakobsdóttir.

Næstu skref stjórnar er að vinna að því að finna merki félagsins, finna liti þess og síðan að fjárfesta í utanyfirgöllum handa öllum iðkendum.  Síðan verður farið í innri skipulagningu starfsins framundan, farið yfir innri mál félagana og unnið að heildarplani sem mun leiða til hagræðingar fyrir félögin í framtíðinni. 

Þessi dagur markar tímamót í sögu íþróttalífs í Ísafjarðarbæ og ég tel að við munum njóta ávaxta þess um ókomna framtíð.

Til hamingju!

Íþrótta - og ungmennafélagið Vestri

Í dag kl. 16 verður íþrótta-og ungmennafélagið Vestri stofnað við hátíðlega athöfn á Hótel Ísafirði.

Stofnfundurinn er lokahnykkur í nokkuð löngu ferli sem hefur kostað mikla vinnu og undirbúning allra þeirra einstaklinga sem að þessu hafa komið.

Þessi stund er fagnaðarefni því þarna eru þrjú stór íþróttafélög að sameina krafta sína til að styrkja sitt starf enn frekar og leggjast saman á árarnar við að gera íþróttalífið í bæjarfélaginu ennþá öflugra en það er í dag.  Það eru mikil samlegðaráhrif sem félögin fá við þetta og verður mjög spennandi að sjá hvernig þessi sameining mun skila sér til þeirra iðkenda sem þarna leggja stund á sína íþrótt.

Mætið endilega á Hótel Ísfjörð í dag, laugardag, kl. 16 og samfagnið þessum félögum á þessum merku tímamótum í þeirra starfi.

 

Kosningarbaráttan

Ekki hef ég verið duglegur að blogga að undanförnu þó margt hafi verið að gerast sem gaman hefði verið að tjá sig eilítið um t.d. vestfjarðaskýrsla ríkisstjórnarinnar, bæjarstjórnarfundurinn í vikunni, málefni framsóknarflokksins sem er að skapa frekar neikvæða umræðu um sig á síðustu metrum kosningarbaráttunar, frábær árangur skíðafólks okkar á landsmóti og Andrésar Andar leikunum, sameining þriggja íþróttafélaga á Ísafirði og svo ýmsar greinar sem hafa verið skrifaðar að undanförnu. Ég læt það aðeins bíða betri tíma að fjalla um þessi mál því það sem á huga minn allan þessa daga er kosningarbaráttan.

Það er nóg að gera í þessari kosningarbaráttunni þó að maður heyri svo út undan sér að frekar rólegt sé yfir þessu öllu saman.  Frambjóðendur eru á ferð og flugi um kjördæmið og síðast þegar ég taldi var búið að skrá þrjá efstu á samanlagt yfir 70 fundi á fjórum vikum.  Þannig að þeir eru út um allt að koma stefnu sjálfstæðisflokksins á framfæri.  Það eru sjónvarpsfundir og síðan sameiginlegir fundir allra framboða sem verða í næstu viku (Borgarnesi, Ísafirði og Sauðárkróki)

Það er nóg að gera fyrir okkur þrjá kosningarstjóra flokksins í Norðvesturkjördæmi við að skipuleggja alla þessa fundi og sjá til þess að allt sé klárt fyrir þá.  Þetta er skemmtileg vinna og krefjandi - maður kynnist fullt af fólki, fólki sem er tilbúið til að leggja stefnu sjálfstæðisflokksins lið og bíður sig fram til vinnu fyrir frambjóðendur.  Vinnan sem þetta fólk leggur á sig er ómetanleg og verður seint þakkað fyrir hana að fullu.  Ef lesendur þessarar síðu vilja leggja okkur lið í baráttunni þá er bara endilega að koma í kosningarmiðstöðvar um land allt og taka þátt.

Ég bið lesendur þessarar síðu um að kynna sér stefnu flokksins á www.xd.is en þar er einnig hægt að leggja spurningar fyrir forystu flokksins um allt það sem snertir hana.

Meira síðar

 

Góðar stundir.