Klofningur og aftur klofningur!

Nú hefur Margrét Sverrisdóttir sagt skilið við Frjálslynda flokkinn, flokkinn sem hún tók þátt í að stofna á sínum tíma í samstarfi við föður sinn og mjög svo stóran "frændgarð" víða um land.  Frjálslyndir voru eins og allir vita klofningur úr Sjálfstæðisflokknum og nú hefur upphafsmaður Frjálslyndra klofið sig frá þeim, s.s. klofningurinn er að klofna!

Hvað nú?  Fer Margrét þá ekki í samstarf við Jón Baldvin, Ómar Ragnarsson, Kristinn H. og fleiri og stofna nýjan flokk sem leggur áherslu "á aðalmálin" eins og Jón Baldvin sagði í nú frægum þætti Silfri Egils.

Æi mér finnst þetta nú alveg ótrúleg dramatík í kringum þetta allt saman og svo segir í frétt um brottför Margrétar að allt að 30 félagsmenn muni segja sig úr flokknum.  Finnst þetta allt bera vott um það að þegar flokkurinn mælist með "aðeins" meira fylgi en í sl. kosningum þá er hver hendinn á móti annarri þarna og ekkert annað gerist en fólk missir trúna á slíkan flokk.  Guðjón Arnar segir þetta vera "vaxtarverki" - flokkurinn geti þetta en þarf bara að læra betur á þessi mál - ótrúlegt - mætti halda að Guðjón hefði aldrei komið á stórt landsþing stjórnmálaflokks.

Hvað sem öðru líður þá kætast aðrir stjórnmálaflokkar núna. Frjálslyndir deila og höfðu varla tíma um helgina til að ræða stefnumál sín fyrir komandi kosningar - allt púðrið fór í kosningar sem svo klúðruðust.

 

Margrét telur sér ekki fært að starfa lengur í Frjálslynda flokknum

Aðalfundur Ferðamálasamtaka Íslands

Ég var fundarstjóri á aðalfundi Ferðamálasamtaka Íslands.  Fundurinn var haldinn á Hótel Ísafirði fimmtudaginn 25.janúar.

Þetta var nokkuð góður fundur - í fyrri hluta hans flutti Sturla Böðvarsson ræðu þar sem hann fjallaði m.a. um þá miklu uppbyggingu vegakerfisins sem mun eiga sér stað hér á næstu tveimur árum.  Sagði hann frá því að Vestfirðingar ættu árið 2008 að komast á bundnu slitlagi til Reykjavíkur.  Slíkt hefur mikil áhrif á ferðamál hér vestra sem og aðra þætti atvinnulífs á svæðinu.  Þverun Mjóafjarðar með tengivegum er hafin, Arnkötludalur fer í útboð á næstunni og leið B á suðursvæði vestfjarða er að fara í útboð allra næstu daga.   Næst er að fá jarðgöng hér vestra,  ekki bara ein heldur þrenn göng.      Já - mikill vill meira.

Jón Páll Hreinsson, framkvæmdarstjóri Markaðsstofu Vestfjarða, flutti erindi um tilurð, verkefni og stefnu markaðsstofunar.

Stefán Stefánsson flutti erindi um stefnumótun í ferðamálum.  Það sem hann hafði fram að færa vakti mikla athygli mína. Samtökin hafa ekki myndað sér eina heildræna stefnu í málaflokknum heldur er hvert hinna átta aðildarfélaga búin að vinna sína stefnu -  þær stefnur eru í engu samræmi við þá stefnu sem ráðuneytið hefur samið.  Mér fannst vanta þarna skýra sýn á framtíðina og hvernig í raun samtökin ætla sér að vinna saman sem ein heild í því að bæta hag aðila í ferðaþjónustunni á landinu.

Sævar Sævarsson frá IGM flutti erindi um vefmál ferðaþjónustunar.  Efni þessa erindis er eitthvað sem hefur verið umræðuefni milli mín og stórfrænda míns Fylkis.  Þarna kom í ljós það sem hann Fylkir hefur haldið fram í langan tíma ásamt nokkrum fleiri - aðilar í ferðaþjónustu eru ekki að vinna heimavinnuna sína varðandi netið og þá miklu notkun ferðamanna á vefmiðlum.  Það eru um 70% bandaríkjamanna sem panta sér ferðir á netinu.  Þetta erindi sagði í raun að ferðaþjónustuaðilar, opinberir sem einstök fyrirtæki, eru ekki að fá þá hittni á heimasíður sem þær ættu í raun að geta náð ef aðilar koma sér saman um heildræna stefnu í þessum málum.

Annars var þetta skemmtilegur fundur og gaman að stjórna honum.  Fróðlegt að fá þarna sýn inn í heim ferðaþjónustuaðila af öllu landinu. 

 

Aðalskipulag Ísafjarðarbæjar 2008 - 2020

Þessi misseri er verið að vinna að aðalskipulagi Ísafjarðarbæjar fyrir árin 2008 - 2020.  Þeirri vinnu er dyggilega stjórnað af umhverfisnefnd og teiknistofunni Eik.  Um komandi helgi fer fram í Hömrum ráðstefna um skipulagið á Hornströndum, eða fyrrum Sléttu-, Grunnavíkur- og Snæfjallahreppum. 

Kíkið á dagskrá ráðstefnunar hér

Það eru margir skemmtilegir fyrirlestrar á ráðstefnunni og verður spennandi að sjá hvað kemur út úr henni.  Ég persónulega er spenntastur fyrir erindi Kjartans Bollasonar um sjálfbæra ferðaþjónustu og einnig erindi Annu Dóru um þolmörk ferðamannasvæða.  Svo verður örugglega mjög gaman að heyra erindi Guðna Einarssonar um aðgang að svæðinu.  Hann hefur verið mikill talsmaður þess að aðgengi að svæðinu verði bætt.

Með erindi Guðna í huga þá kemur alltaf upp umræðan um vegarslóðan sem var lagður inn Leirufjörð.  Þessi vegaslóði var lagður í leyfisleysi að mínu mati en Ísafjarðarbær hefur ekki heimild til heimildar vegalagningar, það er einfaldlega ekki hennar hlutverk heldur er það hlutverk ríkisins að heimila slíkan gjörning.

Það sem hefur síðan gerst í málinu er efni í góðan reifara og verður gaman að lesa þá bók þegar hún kemur út.

Ég er þeirrar skoðunar að það eigi ekki að liggja vegaslóði á þessum slóðum ef slíkt væri leyft væri sjarmörinn farinn af þessu svæði og einnig sú umhverfisvæna stefna sem mér finnst að eigi að vera aðalsmerki þessa svæðis.  Ég veit líka að það eru mér margir ósammála og hafa mjög gild rök til síns máls.

Það verður því gaman að heyra önnur rök á þessari ráðstefnu sem ég bíð í ofvæni eftir.

Vá, vá, vá - hvað er annað hægt að segja!

Eftir að hafa séð ótrúlegt tap íslenska landsliðsins gegn Úkraínu í gær taldi ég mér trú um að nú væri þátttöku landsliðsins sjálf hætt.

Sem betur fer hafði ég rangt fyrir mér - ég er orðlaus - get ekki sagt neitt annað en frábært strákar - þetta er alveg ótrúlegt!

 Áfram Ísland!

Skoðanakönnun Fréttablaðsins - hræringar í pólitík!

Fréttablaðið birti skoðanakönnun í dag - þar kemur margt forvitnilegt í ljós.  Samfylkingin hrynur, VG stækkar, Framsókn er að hverfa, Frjálslyndir eru eins og fyrri könnunum og Sjálfstæðismenn eru nánast í kjörfylgi.  Ríkisstjórnin er fallin ef þetta gengur eftir í kosningunum í vor.  Vinstri menn fagna og biðla til framsóknar um að koma í kaffibandalagið.  Forvitnilegt að þingmaður samfylkingarinnar Björgvin G. Sigurðsson skyldi koma fram í Silfri Egils áðan og segja að framsóknarmenn ættu að koma til samstarfs við þá - fínt að hafa þá ef VG hleypur frá kaffiborðinu.

Það er mín skoðun að Framsóknarflokkurinn er að hverfa því þeir sjálfir hafi hafnað breytingum á flokknum með því að kjósa Jón Sigurðsson sem formann og Guðna Ágústsson sem varaformann.  Þeir eru báðir mætir einstaklingar en birtast kjósendum alveg eins.  Báðir miðaldra karlmenn sem tala jafn forna íslensku og að mínu mati jafn staðnaðir í tali og hugsun.  Tel varla að þeir nái hylli kjósenda í vor.  Reyndar er Guðni nú að há varnarbaráttu í kjördæminu sínu við Hjálmar og verður forvitnilegt að sjá hvernig það kemur út. 

Ég tel að flokkurinn væri allt annar ef félagar í flokknum hefðu haft kjark til að kjósa Sif til forystu.  Nei - það gerðist ekki og hvað gerist - Sif er horfin - fer ekki mikið fyrir henni nú í sviðsljósinu. 

Það eru farnar af stað skemmtilegar samsæriskenningar um Frjálslynda.  Á bloggsíðu Péturs Gunnarssonar kemur fram kenning - hann segir:

Ég var að heyra þá kenningu frá fólki sem ég veit að þekkir betur til en ég að samningur liggi fyrir milli Kristins H. Gunnarssonar og Guðjóns Arnars Kristjánssonar um að Kristinn skipi 1. sæti á lista Frjálslynda flokksins í Norðvesturkjördæmi en Guðjón Arnar flytji sig um set og verði í fyrsta sæti á lista flokksins í öðru hvoru Reykjavíkurkjördæminu

Ég var búin að heyra þetta líka - kannski að Kristinn haldi að hann hafi meira persónufylgi en Guðjón hér vestra, hver veit?  Það er mín skoðun að fylgi Frjálslyndra hér í kjördæminu sé persónufylgi við Guðjón - hvaðan á svo fylgið að koma ef Guðjón fer - úr Framsóknarflokknum.  Nei - ég held að Framsóknarmenn fylgi sér seint um Kristinn ef hann fer í raðið Frjálslyndra.  Margrét gæti líka sett strik í reikningin - hún gæti farið fram hér í kjördæminu og tekið eitthvað af fylgi Frjálslyndra vegna þess að hún á einnig hóp stuðningsmanna á þessu svæði.

Ég er reyndar ánægður með að Kristinn sé farinn úr Framsókn - hann fór og systir mín tók sæti á lista Framsóknar í Norðvesturkjördæmi - Svanlaug Guðnadóttir.  Öndvegis kona þar á ferð sem á framtíð fyrir sér á þessum vettvangi.

Annað sem mér fannst merkilegt í Silfri Egils í dag er að Valdimar Leó mætti með annað merki í barminum núna - merki Frjálslyndra, í þetta sinn gaf hann Agli ekki merkið.

Það er gaman að vera áhugamaður um pólitík þessa dagana - margt að gerast!

Fundardagur!

Það var nokkuð mikið að gerast á fundum hjá mér í gær, fimmtudag. 

Fyrst var fundur í menningarráði Vestfjarða í Þróunarsetrinu eftir hádegið.  Þar á ég sæti fyrir hönd Ísafjarðarbæjar ásamt Ólínu Þorvarðardóttur.  Þetta ráð hefur það hlutverk í fyrstu að semja við menntamálaráðuneyti og samgönguráðuneyti um menningarsamning við Vestfirði.  Einnig á ráðið að semja við öll sveitarfélög á Vestfjörðum um samstarf í menningarmálum.  Slíkir samningar hafa verið gerðir við Austurland og Vesturland.  Einnig má geta þess að slíkur samningur hefur verið gerður við Akureyri en sá samningur sker sig alveg út m.t.t. stærðar og umfangs. 

Á fundinum var verið að endurskoða stefnumótun í menningarmálum í fjórðungnum sem samin var 2002 og lýsti ég þeirri skoðun minni að þessi stefnumótun ætt að fara til umsagnar sem víðast á næstunni.  Sveitarstjórnir eiga að fá að lesa þetta yfir og einnig aðilar úr menningarlífinu.  Vel var tekið í þá hugmynd mína að senda þetta út og verður það gert á næstunni.  Einnig var verið að yfirfara drög að samningi um menningarmál við ráðuneyti menntamála og samgöngu sem hefur verið sendur ráðinu.  Þessi samningur mun einnig vera sendur út ásamt drögum að samstarfssamningi sveitarfélaga í enda þessa mánaðar til sveitarstjórna í fjórðungnum.  Þessi drög eru alveg eins og þeir samningar sem hafa verið undirritaðir á Austur - og Vesturlandi í meginatriðum.  Ekki hefur verið minnst á fjármuni í þessu sambandi af hálfu ríkisins en það er mín skoðun að þeir ættu að vera um 25-30 millj. á ári í 3 ár.  Annars er það mín skoðun að ekki sé um nýtt fjármagn að ræða til menningarmála á þessu svæði.

Ég hvet ykkur til að kíkja á www.menningarviti.is til að kynna ykkur hvað er verið að gera í menningaráði Vesturlands.  Þá getið þið kíkt á samning ríkis og Vesturlands um menningarmál og má þar sjá hvernig drög að samningi við Vestfirði lítur út.

Eftir fund í menningaráði tók við fundur um menningarmál í Ísafjarðarbæ.  Menningarmálanefnd Ísafjarðarbæjar fundar að jafnaði einu sinni í mánuði en hefur verið að funda oftar vegna stefnumótunar sem er í gangi.  Á fundinum í gær var farið yfir nokkrar styrkumsóknir m.a. umsókn Digi - Film um styrk til heimildarmyndar sem gerð var um Act Alone hátðina og styrkur til að fagna aldarafmælis fyrrum heiðursborgara Ísafjarðarbæjar, Guðmundi Inga Kristjánssyni. 

Einnig var á fundinum rætt um aðalskipulag Ísafjarðarbæjar en það er erindi sem vísað var til nefndarinnar frá umhverfisnefnd.  Þar var mér og Rúnari falið að koma með drög að svari til handa nefndinni. 

Stærsta málið í nefndinni þessa dagana er síðan stefnumótunin og erum við að koma saman texta sem verður sendur út í vikunni til umsagnar til lykilaðila í menningarmálum.  Það er von nefndarinnar að störfum við stefnumótunina ljúki í enda febrúar.

Að loknum þessum fundi var síðan fundur í bæjarstjórn.  Þar lágu fyrir 3 fundargerðir bæjarráðs ásamt fundargerðum annarra nefnda.

Má segja að þetta hafi verið stuttur fundur - búin rétt um 20:30 - má skýra það af því að fulltrúar samfylkingarinnar áttu fund á hótelinu með yfirstýru sinni, Ingibjörgu Sólrúnu. 

Á fundinum var nokkuð mikið talað um byggðasafnið og uppbyggingu þess.  Þar hef ég hafið vinnu ásamt Jóni Sigurpáls og Jóhanni Bæring til að hugsa fram í tímann til að geta mætt fjölgun ferðamanna á safnið.  Nokkuð var einnig rætt um hugsanlega sölu slökkvibíls en því hef ég verið á móti og finnst að bílinn ætti að vera hér á svæðinu og gerður upp á næstu árum.

Síðan var farið yfir eitt og annað í fundargerðum nefnda og að mínu mati bar þar hæst tillaga íþrótta - og tómstundarnefndar um að flytja afrekssjóð yfir til HSV.  Stórt skref til framfara að mínu mati.  Flutningurinn var samþykktur í bæjarstjórn 8-1 ( Jóna Ben.) greiddi atkvæði á móti tillögunni og hafði fyrir því gild rök.

Nokkuð annað var rætt á fundinum í gær sem ég mun gera skil hér á síðunni á næstunni.

 

Bloggsíða

Komið þið sæl!

Tilgangur minn með opnum þessarar bloggsíðu er að gera mér kleift að koma skoðunum mínum á ákveðnum málum á framfæri sem einstaklingur, bæjarfulltrúi og formaður Héraðssambands Vestfirðinga.

Það er von mín að allir hafi gagn og gaman af.

Góðar stundir!