Stuðmannaframboðið verður eflaust kallað Íslandsframboðið!

Nokkrir bloggarar, m.a. denni og Hanna Birna, eru að velta fyrir sér framboði Margrétar Sverrisdóttur, Ómars Ragnarssonar og Jakobs Frímanns sem gárungarnir voru nú farnir að kalla Stuðmannaframboðið.

Það hefur einhver fylgikona Margrétar skráð lénið Íslandslistinn.is á netinu og kemur fram í bloggi Tómas Ha hver það er og hvernig menn tengja það við Margréti. 

Það er ekkert smá nafn! 

Var ekkert annað laust?

Það verður gaman að sjá hvort þetta rætist allt saman hjá þeim. 

Ég hef ekki trú á því að þetta framboð taki fylgi frá Sjálfstæðisflokknum.  Það mun að öllum líkindum taka sitt fylgi frá VG en stóra spurningin er í raun sú hvort að umhverfisverndarsinnar séu ekki búnir að finna sig í VG og vilji ekki fara þaðan, á slíkt bendi stjórnmálafræðingur hjá morgunblaðinu á um daginn þegar nýjast könnunin var kynnt.

 

Össur aftur orðinn formaður Samfylkingarinnar?

Sólveig Pétursdóttir er eins og alþjóð veit Forseti Alþingis.  Hún lendi í frekar neyðarlegu atviki í morgun þegar hún var að stjórna þingfundi. 

Össur Skarphéðinsson hafði beðið um orðið.  Sólveig steig á fætur og sagði hátt og snjallt - Össur Skarphéðinsson Formaður Samfylkingarinnar hefur beðið um orðið. 

Þetta vakti mikla kátínu í þingsal og það var stoltur þingflokksformaður Samfylkingar sem steig í ræðustól.

 

Smá innlegg í klámumræðuna

Endilega kíkið á þessa síðu http://www.baggalutur.is/ 

Þeir eru bara snillingar þessir strákar

Ísafjarðarbær styrkir Komedíuleikhúsið

Í dag, föstudag,  kl. 16 fer fram undirritun á samningi milli Ísafjarðarbæjar og Komedíuleikhúsins á Ísafirði í Stjórnsýsluhúsinu.

Um er að ræða samning sem styrkir starf eina atvinnuleikhús á Vestfjörðum um 1,4 milljón á ári í þrjú ár.

Í samningnum stendur að komedíuleihúsið eigi að sýna stykki sín í Grunnskólum og leikskólum Ísafjarðarbæjar eftir ákvörðun skólastjórnenda hverju sinni.  Komedíuleikhúsið mun einnig taka að sér ýmsa menningarstarfsemi í bæjarfélaginu en í því sambandi má benda á húslestur í Safnahúsinu sem byrjaði fyrir jól.  Einnig á komedíuleikhúsið að koma að undirbúningi menningarviðburða í Ísafjarðarbæ og taka þátt í viðburðum sem menningarmálanefnd ákveður.

Þetta er mikil viðurkenning fyrir það mikla og góða starf sem Komedíuleikhúsið hefur unnið á undanförnum árum.

Það er von mín að þessi fjárhæð komi til með að styrkja starfið hjá leikfélaginu sem muni verða til þess að leikhúsið dafni og setji skemmtilegan svip á menningarlíf bæjarfélagsins. 

Ég hef rætt við Elfar Loga um að koma að því að skapa skemmtilega miðbæjarstemmingu þegar vel viðrar á sumrin.  Einnig að koma að því að setja upp leikstykki við Byggðasafnið þegar skemmtiferðaskip eru í höfn á sumrin.  Vonandi verður af þessum atburðum í sumar.

Ég bind vonir við að þessi samningur muni verða til þess að leikhúslíf muni dafna og vaxa enn meir í framtíðinni.

Íslandsglíman á Vestfjörðum

Á morgun laugardag fer fram þriðja, og jafnframt síðasta umferðin, í Íslandsglímu í íþróttahúsinu á Torfnesi.

Þetta er í fyrsta sinn sem íslandsglíman fer fram á þessu svæði og er því um að ræða stóran viðburð í vestfirsku íþróttalífi.

Ég hvet alla til að mæta og líta á þetta glímumót á Torfnesi á morgun, laugardag.  Hvetja Harðverja sem eru að keppa um verðlaun á þessu móti.´

Áfram Hörður!

LS og kennarar ná saman!

Nást hafa samningar á milli launanefndar sveitarfélaga og kennara sem gerir ráð fyrir ums 6% launahækkun til loka maí 2008.

Sitt sýnist hverjum um þennan samning þegar maður les blogg um hann hér á netinu.

Ég er ánægður með að þessir aðilar hafi náð saman um þessa hluti.  Það skiptir nú máli að setjast strax niður og byrja að ræða næsta samning og einnig framtíðina í skólastarfi á landinu.  Það er nauðsynlegt að sveitarfélög og kennarar byrji strax að ræða saman um hver sé framtíð skólastarfsins.

Til hamingju með að ná þessum samningum en ég veit vel að þetta er aðeins byrjunin á löngu ferli sem við verðum að byrja strax á.

Andlát

Torfi Tómasson stórkaupmaður lést á landspítalanum 6. mars sl.

Torfi er betur þekktur í sundheiminum sem Torfi í speedo - þar sem hann var umboðsmaður speedo sundfatnaðar frá árinu 1963 til ársins 2006. 

Torfi var stórmenni í íslensku sundlífi en hann var formaður sundfélagsins Ægis á árunum 1956 - 1966.  Síðar var hann formaður sundsambands Íslands og stjórnarmaður í Ólympíunefnd Íslands og fór sem fararstjóri á tvenna Ólympíuleika.

Torfi var ávallt mikill stuðningsmaður sundíþróttarinnar í landinu. 

Mikill maður er fallinn frá - blessuð sé minning hans!

Ég votta fjölskyldu Torfa samúð mína

Leiðari morgunblaðsins í dag

Leiðari morgunblaðsins í dag fjallar um atvinnuástandið á Vestjörðum.

Þegar ég fjallaði um atvinnumál í ræðu minni á síðasta bæjarstjórnarfundi fjallaði ég meðal annars um það sem leiðarinn fjallar um.

Það þýðir samt ekki að við verðum að greina vandann áður en við ráðust á hann.  Umræður um málið m.a. á borgarafundinum á sunnudaginn mun, að mínu mati, koma að góðu gagni við að greina vandann þannig að við í sameiningu getum ráðist að rótum hans og komið ástandinu i betra horf.

Borgarafundur - lifi Vestfirðir!

Á sunudaginn kemur kl. 14 verður haldinn opinn borgarafundur um atvinnumál á Vestfjörðum í hömrum.

Fundurinn ber yfirskriftina Lifi Vestfirðir

Ég fagna því að þessi fundur sé haldinn og vona að íbúar fjölmenni og láti í ljós skoðun sína á þessu mjög svo mikilvæga málefni.

Bæjarstjórn Ísafjarðarbæjar sameinaðist á síðasta fundi sínum um tvær ályktanir um þessi mál.  Annarsvegar var það tillaga okkar meirihlutamanna sem er þannig:

Bæjarstjórn Ísafjarðarbæjar samþykkir tillögur bæjarráðs vegna atvinnumála. Þess er krafist af hálfu bæjarstjórnar að ríkisstjórnin bregðist við þessum tillögum nú þegar enda fjalla þær um átak í málaflokkum sem ríkisstjórnin hefur samþykkt að vinna. Flutningur 100 opinberra starfa á tveimur árum til byggðakjarnans Ísafjarðar er í samræmi við samþykkta stefnu ríkisstjórnarinnar. Stefnu sem ekki hefur verið unnið eftir heldur hefur opinberum störfum þvert á móti fækkað á undanförnum árum á sama tíma og þeim fjölgar í höfuðborginni.
Tilvera framleiðslufyrirtækja á Vestfjörðum byggir á því að hægt sé að flytja hráefni að og frá. Þar er flutningskostnaður farinn að hamla verulega, svo verulega að fyrirtæki í sjávarútvegi og iðnaði telja kostnaðinn alvarlega ógnun við starfsemi þeirra. Bæjarstjórn Ísafjarðarbæjar telur lífsnauðsynlegt fyrir vestfirskar byggðir að ríkisstjórnin jafni flutningskostnað þannig að fyrirtækin séu jafnsett hvað þann þátt rekstrarins varðar.

Þessi tillaga var samþykkt 9-0

Tillaga minnihlutans var svohljóðandi:

,,Bæjarstjórn Ísafjarðarbæjar vill í tilefni af síðustu atburðum í atvinnumálum bæjarins lýsa yfir áhyggjum af stöðu atvinnulífs á svæðinu og hvetja til sameiginlegs átaks ríkis, sveitarfélaga og fyrirtækja til eflingar atvinnulífi og byggð á Vestfjörðum.
Ákvörðun stjórnenda Marels hf. að hætta starfsemi fyrirtækisins á Ísafirði frá og með 1. september næstkomandi er mjög alvarleg atlaga að atvinnulífi bæjarins. Í rúma þrjá áratugi hefur á Ísafirði verið þróun framleiðsla á rafeindabúnaði í tengslum við fyrirtæki í útgerð og fiskvinnslu á Vestfjörðum. Margþætt reynsla og þekking hefur verið byggð upp í þessu samstarfi, sem fram kom meðal annars í hinum víðþekktu Póls-skipavogum og fleir framleiðsluvörum byggðu á hugviti og framtaki heimamanna. Fyrir réttum þrem árum keypti Marel hf. fyrirtækið Póls hf. á Ísafirði og ári síðar voru félögin sameinuð. Með því eignaðist Marel hf. þróunarvinnu og þekkingu sem byggst hafði upp á löngum tíma hér á Ísafirði. Fyrir þremur árum lýstu eigendur og stjórnendur fyrirtækisins því yfir að ekki stæði til að flytja starfsemina burtu úr bænum. Nú hefur annað komið á daginn og með ákvörðun sinni hafa forráðamenn Marels hf. brugðist vonum og trausti Ísfirðinga. Allt tal um samfélagslega ábyrgð fyrirtækja eru orðin tóm.
Bæjarstjórn Ísafjarðarbæjar telur að með lokun Marels hf. á Ísafirði sé vegið að undirstöðum atvinnulífs á staðnum og uppbygging iðnaðar á sviði hátækni og hugvits greitt þungt högg. Til að bregðast við þessu heitir bæjarstjórn á stjórnvöld að koma þegar í stað til liðs við íbúa Ísafjarðarbæjar og annarra sveitarfélaga á Vestfjörðum til að efla nýsköpun og rannsóknir sem veita munu nýjum verkefnum og nýjum atvinnutækifærum brautargengi. Miklir möguleikar eru á Vestfjörðum á sviði sjávarútvegs, fiskeldis, rannsókna á umhverfi, loftslagi og búsvæðum hafsins og iðnaði tengdum þeim greinum. Til að nýta þessa möguleika er nauðsynlegt að stjórnvöld beini fjármagni til þessara verkefna. Jafnframt þurfa bráðnauðsynlegar framkvæmdir í samgöngumálum og fjarskiptum að fá algeran forgang frá hendi ríkisvaldsins, til að brúa það bil sem myndast hefur í umhverfi fyrirtækja á Vestfjörðum miðað við aðra landshluta.
Bæjarstjórn Ísafjarðarbæjar leggur áherslu á að algera hugarfarsbreytingu þarf og pólitíska samstöðu hjá ráðamönnum landsins til að snúa við óheillaþróun síðustu ára.  Bæjarstjórnin hvetur alla stjórnmálaflokka til að styðja framkomnar tillögur heimamanna í atvinnumálum og stuðla þannig að eflingu byggðar á Vestfjörðum. Nú þarf stórátak í stað smáskammta. Segja má að loksins sé röðin komin að Vestfjörðum.“

Þessi tillaga var einnig samþykkt 9-0

Finna.is!

Í síðustu viku sendi starfsmaður Ísafjarðarbæjar út tölvupóst til fyrirtækja innan Ísafjarðarbæjar sem fól í sér tilboð á þjónustu sem Finna.is veitir. 

Hefur þessi tölvupóstur síðan komið af stað nokkrum umræðum á vef bb. 

Um var að ræða tilboð sem barst Ísafjarðarbæ frá fyrirtæki sem heitir Finna.is.  Það fyrirtæki er dótturfyrirtæki EcWeb sem gerði heimasíðu Ísafjarðarbæjar. 

Tilboðið fól í sér að fyrirtæki í Ísafjarðarbæ myndu fá verulegan afslátt á þjónustu Finna.is í gegnum vef Ísafjarðarbæjar.  Þetta var áhugavert tilboð og því var það sent til allra þeirra fyrirtækja sem eru á skrá í bæjarfélaginu.

Finna.is bíður s.s. fyrirtækjum að senda sér almennar upplýsingar um fyrirtækið sem síðan verður sett inn á vefsíðu Ísafjarðarbæjar sem og heimasíðu Finna.is - er slíkt gert án greiðslu.  Vilji hinsvegar fyrirtæki senda ítarlegri upplýsingar um starfsemi þess þá þarf að greiða fyrir slíkt.

Ég treysti eigendum fyrirtækja og rekstraraðilum stofnana alveg til að taka upplýsta ákvörðun um hvernig þeir koma sínu fyrirtæki og stofnun á framfæri.  Þeir taka eflaust ákvörðun út frá mörgum þáttum og leita leiða til að gera það á eins hagkvæmastan hátt sem um leið nær til sem flestra væntanlegra viðskiptavina. 

Það sem vakti fyrir starfsmanni Ísafjarðarbæjar, þegar hann sendi út tölvupóstinn, var að vekja athygli á tilboði sem hugsanlega einhverjir vildu nýta sér. 

Þegar Ísafjarðarbær keypti heimasíðu af fyrirtækinu EcWeb var  í þeim pakka, ásamt mörgum öðrum kerfum, beintenging við Finna.is og leit í fyrirtækjum og stofnunum sem hafa starfstöð í Ísafjarðarbæ. 

Það var ljóst frá upphafi að sú tenging sem þar er með lágmarksupplýsingum um fyrirtæki og stofnanir mun verða í boði án greiðslu en allar ítarlegri upplýsingar sem fyrirtæki vildu koma á framfæri væri háð taxta Finna.is. 

Það er erfitt að halda úti fullkominni skrá um fyrirtæki án ábendinga um leiðréttingar frá fyrirtækjum og stofnunum sjálfum.  Bera saman Súðavík og Ísafjörð í þessu sambandi er ekki hægt, fjöldi fyrirtækja og stofnana í Ísafjarðarbæ er umtalsverð fleiri en í Súðavík. 

Það er von mín að fyrirtæki í Ísafjarðarbæ sjái sér fært að senda lágmarksupplýsingarnar inn þannig að sú skrá sé að minnsta kosti rétt.  Annað bið ég ekki um - ef fyrirtæki sjá sér ekki hag í því að borga fyrir að hafa fleiri upplýsingar inn á vef Finna.is þá bara gera þeir það ekki, svo einfalt er það.